ബാഹുബലി : ബിഫോർ ദി ബിഗിനിംഗ്, ശിവകാമിയാകാൻ വാമിക ഗബ്ബി

എസ് എസ് രാജമൌലി സംവിധാനം ചെയ്ത ബ്രഹ്മാണ്ഡ സിനിമയായിരുന്നു ബാഹുബലി. ബാഹുബലി ബിഗിനിംഗും, ബാഹുബലി കൺക്ലൂഷനും ഇന്ത്യയിലെ ഏറ്റവും വലിയ സിനിമകളിൽ ഒന്നാണ്. ഈ ചിത്രങ്ങൾ ഉണ്ടാക്കിയ ഓളം ഇപ്പോഴും അവസാനിച്ചിട്ടില്ല. വിജയേന്ദ്ര പ്രസാദ് ആയിരുന്നു ചിത്രത്തിൻറ്റെ തിരക്കഥ ഒരുക്കിയത്. പ്രഭാസ്, അനുഷ്ക ഷെട്ടി, രമ്യ കൃഷ്ണൻ, തമന്ന, റാണ ദഗ്ഗുപതി, സത്യരാജ്, നാസർ തുടങ്ങി വലിയ ഒരു താരനിരയും ചിത്രത്തിൽ ഉണ്ടായിരുന്നു.
ചിത്രത്തിലെ ഒരു പ്രധാന കഥാപാത്രമായിരുന്നു രാജമാത ശിവകാമി ദേവി. രമ്യ കൃഷ്ണനാണ് ഈ കഥാപാത്രത്തെ സ്ക്രീനിൽ അവതരിപ്പിച്ചത്. ഇപ്പോഴിതാ രാജമാത ശിവകാമിയുടെ ജീവിതവും വെബ് സീരീയസായി വരാൻ പോകുന്നു. ഒരു മണിക്കൂർ വീതമുള്ള ഒൻപത് എപ്പിസോഡുകളായാണ് സീരീസ് നെറ്റ്ഫ്ലിക്സിൽ വരാൻ പോകുന്നത്.

ശിവകാമിയുടെ കുട്ടിക്കാലവും യൌവനവും സിരിസിൽ ഉണ്ടാകും. എന്നാൽ ശിവകാമിയെ സ്ക്രീനിൽ അവതരിപ്പിക്കുന്നതോ മലയാളികൾക്ക് ഏറെ സുപരിചിതയായ പഞ്ചാബി താരം വാമിക ഗബ്ബിയാണ്. ഗോദ എന്ന ചിത്രത്തിലുടെ ടൊവിനോ തോമസിൻറ്റെ നായിക ആയിട്ടാണ് വാമിക മലയാളത്തിൽ എത്തുന്നത്. ചിത്രത്തിൽ ഒരു ഗുസ്തിക്കാരിയുടെ വേഷമാണ് വാമിക ചെയ്തത്. പിന്നീട് പൃഥ്വിരാജിൻറ്റെ ഒപ്പം നൈൺ എന്ന ചിത്രത്തിലും വാമിക അഭിനയിച്ചിട്ടുണ്ട്. മലയാളത്തിനു പുറമേ നിരവധി ഹിന്ദി, തമിഴ്, തെലുങ്ക് ചിത്രങ്ങളിലും വാമിക തൻറ്റെ സാന്നിധ്യം അറിയിച്ചിട്ടുണ്ട്.
ആനന്ദ് നീലകൺഠൻറ്റെ ‘ ദി റൈസ് ഓഫ് ശിവകാമി ‘ എന്ന പുസ്തകത്തെ അടിസ്ഥാനമാക്കിയാണ് ബാഹുബലി ബിഫോർ ദി ബിഗിനിംഗ് ഒരുക്കുന്നത്. ആർക് മീഡിയയും രാജമൌലിയും ചേർന്നാണ് ചിത്രം നിർമ്മിക്കുന്നത്. ദേവകട്ടയും പ്രവീൺ സറ്ററും ആണ് ചിത്രത്തിൻറ്റെ സംവിധാനം നിർവഹിക്കുന്നത്.