മണി രത്നം സംവിധാനം ചെയ്യുന്ന പുതിയ ചിത്രത്തിൽ ബാബു ആൻറ്റണിയും

മണി രത്നം സംവിധാനം ചെയ്യുന്ന പുതിയ ചിത്രത്തിൽ ബാബു ആൻറ്റണിയും. പൊന്നിയിൽ സെൽവൻ എന്ന് പേരിട്ടിരിക്കുന്ന ചിത്രം കൽകി കൃഷ്ണമൂർത്തിയുടെ നോവലിനെ ആസ്പദമാക്കി നിർമ്മിക്കുന്ന ഒരു എപിക് ഹിസ്റ്റോറിക്കൽ ഡ്രാമയാണ്. വലിയ താരനിര അണിനിരക്കുന്ന ചിത്രമാണ് പൊന്നിൽ സെൽവൻ. വിക്രം, ഐശ്വര്യ റായ്, ജയം രവി, തൃഷ, പ്രഭു, ശരത് കുമാർ, വിക്രം പ്രഭു, കിഷോർ, അശ്വിൻ എന്നിവർക്ക് പുറമേ മലയാളി താരങ്ങളായ ജയറാം, ഐശ്വര്യലക്ഷ്മി, റഹ്മാൻ എന്നിവരും അണിനിരക്കുന്നുണ്ട്. ഇപ്പോഴിതാ ഇവർക്ക് പുറമേ ബാബു ആൻറ്റണിയും ചിത്രത്തിൽ എത്തുന്നുണ്ടന്നാണ് പുറത്ത് വന്നിരിക്കുന്ന വിവരം.

ബാബു ആൻറ്റണി തന്നെയാണ് ഈ വിവരം തൻറ്റെ സോഷ്യൽ മീഡിയയിലൂടെ ആരാധകരുമായി പങ്കുവെച്ചത്. മണി രത്നം സാറിൻറ്റെ സ്വപ്ന പ്രോജക്റ്റ് പൊന്നിയിൽ സെൽവനിൽ ഞാൻ ഒരു പ്രധാന കഥാപാത്രത്തെ അവതരിപ്പിക്കുമെന്ന വിവരം എല്ലാവരുമായും പങ്കുവെയ്ക്കാൻ ഏറേ സന്തോഷമുണ്ട് എന്നാണ് ബാബു ആൻറ്റണി ഫേസ്ബുക്കിൽ പോസ്റ്റ് ചെയ്തത്. പൊന്നിയിൽ സെൽവൻറ്റെ പോസ്റ്ററിനൊപ്പമാണ് ബാബു ആൻറ്റണി കുറിപ്പും പങ്കുവെച്ചിരിക്കുന്നത്.

രണ്ട് ഭാഗങ്ങളായി റിലീസ് ചെയ്യുന്ന ചിത്രത്തിൻറ്റെ ആദ്യ ഭാഗം അടുത്ത വർഷം റിലീസ് ചെയ്യുമെന്ന് സിനിമയുടെ അണിയറപ്രവർത്തകർ നേരത്തെ അറിയിച്ചിരുന്നു. മദ്രാസ് ടാക്കീസും ലൈക പ്രൊഡക്ഷൻസും ചേർന്ന് നിർമ്മിക്കുന്ന ചിത്രത്തിൻറ്റെ തിരക്കഥ ഒരുക്കിയിരിക്കുന്നത് മണി രത്നവും കുമാരവേലും ചേർന്നാണ്. ചിത്രത്തിൻറ്റെ സംഭാഷണം ജയമോഹൻ, ഛായാഗ്രഹണം രവി വർമ്മൻ, സംഗീത സംവിധാനം എ ആർ റഹ്മാൻ, എഡിറ്റിംങ് ശ്രീകർ പ്രസാദ്, ആക്ഷൻ ശ്യാം കൌശൽ, കലാസംവിധാനം വാസിം ഖാൻ തോട്ട ധരണി, വസ്ത്രാലങ്കാരം ഏക ലഖാനി, നൃത്ത സംവിധാനം ബൃന്ദ എന്നിവരും നിർവ്വഹിക്കുന്നു.