പാപ്പനിൽ സുരേഷ് ഗോപിക്കൊപ്പം മകൻ ഗോകുൽ സുരേഷും | Paappan Suresh Gopi Movie

വിജയ ചിത്രമായ പൊറിഞ്ചു മറിയം ജോസിനുശേഷം ജോഷി സംവിധാനം ചെയ്യുന്ന പുതിയ ചിത്രമാണ് പാപ്പൻ ( Paappan ). പാപ്പനിലെ കേന്ദ്ര കഥാപാത്രമായ മാത്യൂസ് പാപ്പൻ എന്ന പോലീസ് ഓഫീസറായാണ് സുരേഷ് ഗോപി എത്തുന്നത്. സുരേഷ് ഗോപിയോടൊപ്പം മകൻ ഗോകുൽ സുരേഷും ഈ ചിത്രത്തിലുണ്ട്. ഇരുവരും ഒന്നിച്ച് അഭിനയിക്കുന്ന ആദ്യ ചിത്രം കൂടിയാണിത്. മൈക്കിൾ എന്ന കഥാപാത്രത്തെയാണ് ഗോകുൽ ഈ സിനിമയിൽ അവതരിപ്പിക്കുന്നത്. സിനിമയിലെ കഥാപാത്രങ്ങളുടെ ഗെറ്റപ്പിലുള്ള ഇരുവരുടെയും ചിത്രം സുരേഷ് ഗോപി ഈയിടെ സോഷ്യൽ മീഡിയയിൽ പങ്കുവച്ചിരുന്നു. ലേലം, വാഴുന്നോർ, പത്രം തുടങ്ങിയ നിരവധി സൂപ്പർ ഹിറ്റ് ചിത്രങ്ങൾക്ക് ശേഷം ജോഷിയും സുരേഷ് ഗോപിയും ഒന്നിക്കുന്ന ക്രൈം ത്രില്ലർ മൂവിയാണിത്.

ഡേവിഡ് കാച്ചപ്പിള്ളി പ്രൊഡക്ഷൻസിൻറ്റെ ബാനറിൽ ഡേവിഡ് കാച്ചപ്പിള്ളിയാണ് ചിത്രം നിർമ്മിക്കുന്നത്.ചിത്രത്തിൽ പാപ്പൻറ്റെ ഭാര്യയായി നൈല ഉഷയും, മകളും ഐപിഎസ് ഓഫീസറുമായി പൂമരം മൂവി ഫെയിം നിത പിള്ളയും വേഷമിടുന്നു. കൂടാതെ സണ്ണി വെയ്ൻ, കനിഹ, വിജയരാഘവൻ, ആശ ശരത്ത്, ടിനി ടോം, ചന്ദുനാഥ്, ഷമ്മി തിലകൻ തുടങ്ങിയ വമ്പൻ താരനിരയും സിനിമയിൽ അണിനിരക്കുന്നു. സുരേഷ് ഗോപിയുടെ കരിയറിലെ 252-ാമത്തെ ചിത്രമാണ് പാപ്പൻ. വളരെ നാളുകൾക്ക് ശേഷം സുരേഷ് ഗോപി പോലീസ് ഓഫീസറുടെ വേഷത്തിൽ എത്തുന്നുയെന്നതും ഈ സിനിമയുടെ മറ്റൊരു പ്രത്യേകതയാണ്.
ആഘോഷ് സിനിമാസും ചാന്ദ് വി മൂവിസും ചേർന്ന് പുറത്തിറക്കുന്ന ചിത്രത്തിൻറ്റെ തിരക്കഥ ഒരുക്കിയിരിക്കുന്നത് റേഡിയോ ജോക്കിയും തിരക്കഥാകൃത്തുമായ ഷാൻ ആണ്. ചിത്രത്തിൻറ്റെ ഛായാഗ്രഹണം നിർവ്വഹിച്ചിരിക്കുന്നത് അജയ് ഡേവിഡ് കാച്ചപ്പിള്ളിയാണ്. എഡിറ്റർ ശ്യാം ശശിധരൻ, സൌണ്ട് ഡിസൈൻ വിഷ്നു ഗോവിന്ദ് , ആർട്ട് നിമേഷ് എം താനൂർ, സംഗീതം ജേക്സ് ബിജോയി.