പ്രണവ് മോഹൻലാൽ, കല്യാണി പ്രിയദർശൻ, ദർശന രാജേന്ദ്രൻ എന്നിവരെ കേന്ദ്ര കഥാപാത്രങ്ങളാക്കി വിനിത് ശ്രീനിവാസൻ തിരക്കഥയെഴുതി സംവിധാനം ചെയ്യുന്ന പുതിയ ചിത്രമാണ് ഹൃദയം. പ്രഖ്യാപനസമയം മുതൽ പ്രേക്ഷകർ ഏറേ ആകാംക്ഷയോടെ കാത്തിരിക്കുന്ന ചിത്രത്തിൻറ്റെ റിലീസ് തിയതി പ്രഖ്യാപിച്ചിരിക്കുകയാണ് സിനിമയുടെ അണിയറപ്രവർത്തകർ ഇപ്പോൾ. 2022 ജനുവരി 21ന് ചിത്രം തിയേറ്ററുകളിൽ റിലീസ് ചെയ്യും. മോഹൻലാലാണ് ചിത്രത്തിൻറ്റെ റിലീസ് തിയതി സോഷ്യൽ മീഡിയയിലൂടെ പുറത്ത് വിട്ടത്.
മെറിലാൻഡ് സിനിമാസും ബിഗ് ബാംഗ് എൻറ്റർടൈൻമെൻറ്റ്സിൻറ്റെയും ബാനറിൽ വിശാഖ് സുബ്രമണ്യവും നോബിൾ ബാബു തോമസും ചേർന്ന് നിർമ്മിക്കുന്ന ചിത്രത്തിൽ അജു വർഗ്ഗീസ്, അരുൺ കുര്യൻ, മീനാക്ഷി രവീന്ദ്രൻ, വിജയരാഘവൻ, ബൈജു സന്തോഷ്, ജോജോ ജോസ്, ആദർശ് സുകുമാരൻ, പ്രശാന്ത് നായർ തുടങ്ങി നിരവധി താരങ്ങളും അണിനിരക്കുന്നുണ്ട്.
ചിത്രത്തിൻറ്റെ ഛായാഗ്രഹണം വിശ്വജിത്ത് ഒടുക്കാതിൽ, എഡിറ്റിംങ് രഞ്ജൻ അബ്രാഹം, വസ്ത്രാലങ്കാരം ദിവ്യ ജോർജ്, മേക്കപ്പ് ഹസ്സൻ വന്ദൂർ, സംഘട്ടനം മാഫിയ ശശി തുടങ്ങിയവർ നിർവ്വഹിക്കുന്നു. പാട്ടുകൾക്ക് ഏറേ പ്രാധാന്യമുള്ള ചിത്രത്തിൽ 15 ഗാനങ്ങളാണ് ഉൾപ്പെടുത്തിയിരിക്കുന്നത്. ഇതിനോടകം പുറത്തിറങ്ങിയ ചിത്രത്തിലെ ഗാനങ്ങൾക്ക് മികച്ച പ്രേക്ഷക സ്വീകാര്യതയാണ് ലഭിച്ചിരിക്കുന്നത്. ഹേഷാം അബ്ദുൾ വഹാബാണ് ചിത്രത്തിൻറ്റെ സംഗീത സംവിധായകൻ.
കൊച്ചി, പാലക്കാട്, ചെന്നൈ എന്നിവടങ്ങളിലായാണ് സിനിമയുടെ ഷൂട്ടിംങ്. തൻറ്റെയും ഭാര്യയുടെയും സുഹൃത്തുക്കളുടെയും ജീവിതത്തെയും കോളേജ് കാലഘട്ടത്തെയും അടിസ്ഥാനമാക്കിയാണ് സിനിമ ചിത്രീകരിച്ചിരിക്കുന്നതെന്ന് ചിത്രത്തിൻറ്റെ സംവിധായകൻ വിനീത് ശ്രീനിവാസൻ നേരത്തെ പറഞ്ഞിരുന്നു. വിനീതും ഭാര്യയും പഠിച്ച ചെന്നൈയിലെ കെസിജി കോളേജ് ഓഫ് ടെക്നോളജിയിൽ ആണ് സിനിമയുടെ പ്രധാന ഭാഗങ്ങൾ ഷൂട്ട് ചെയ്തിരിക്കുന്നത്.