തെന്നിന്ത്യയിലും ബോളിവുഡിലും ഒരുപോലെ തിളങ്ങി നിൽക്കുന്ന താരം ആണ് ദുൽഖർ സൽമാൻ. ഏതാനും ദിവസങ്ങൾക്കു മുമ്പാണ് ദുൽഖർ നായകനാകുന്ന പുതിയ ബോളിവുഡ് ചിത്രത്തിൻറ്റെ വിവരങ്ങൾ പുറത്തുവന്നത്. ആർ ബാൽകി ആണ് ചിത്രം സംവിധാനം ചെയ്യുന്നത്.
ഇപ്പോഴിതാ ചിത്രത്തിൽ അമിതാഭ് ബച്ചനും ഉണ്ടെന്ന റിപ്പോർട്ടുകളാണ് പുറത്തുവരുന്നത്. ഒരു അതിഥി വേഷത്തിലാണ് അമിതാഭ് ബച്ചൻ എത്തുന്നത് എന്നും വാർത്തകളുണ്ട്. ഏതായാലും ഈ വാർത്തയാണ് സമൂഹ മാധ്യമങ്ങളിൽ ഇപ്പോൾ തരംഗമായിക്കൊണ്ടിരിക്കുന്നത്. ദുൽഖറിൻറ്റെ ആരാധകരും ഈ വാർത്ത ഏറ്റെടുത്തിരിക്കുകയാണ്.
പുതിയ ചിത്രത്തിൻറ്റെ വിശേഷങ്ങൾ ദുൽഖർ തന്നെ ആണ് സോഷ്യൽ മീഡിയയിലൂടെ പങ്കുവച്ചത്. തനിക്ക് ഏറ്റവും പ്രിയപ്പെട്ട താരങ്ങളുടെ കൂടെ അഭിനയിക്കാൻ സാധിക്കുന്നതിൽ വളരെ അധികം സന്തോഷമുണ്ടെന്നും താൻ ആകാംക്ഷയിലാണെന്നും ആണ് ദുൽഖർ ഫേസ്ബുക്കിൽ കുറിച്ചത്.
ചിത്രം ഒരു ത്രില്ലർ മൂവി ആണെന്നാണ് പുറത്തുവരുന്ന റിപ്പോർട്ടുകൾ. ദുൽഖറിനൊപ്പം പൂജ ഭട്ട്, സണ്ണി ഡിയോൾ, ശ്രേയ ധന്വന്തരി എന്നിവരും പ്രധാന വേഷങ്ങളിൽ എത്തുന്നുണ്ട്. 2022 ൽ ചിത്രം തിയേറ്ററിൽ റിലീസ് ചെയ്യാനാണ് ചിത്രത്തിൻറ്റെ അണിയറപ്രവർത്തകർ തീരുമാനിച്ചിരിക്കുന്നത്. ചിത്രത്തിൻറ്റെ ഷൂട്ടിംഗ് വൈകാതെ തന്നെ ആരംഭിക്കുമെന്നും റിപ്പോർട്ടുകൾ ഉണ്ട്. എന്നാൽ ചിത്രത്തിൻറ്റെ പേരോ മറ്റു വിവരങ്ങളോ അണിയറപ്രവർത്തകർ പുറത്ത് വിട്ടിട്ടില്ല.
ദുൽഖർ സൽമാൻ നായകനായി എത്തുന്ന മൂന്നാമത്തെ ബോളിവുഡ് ചിത്രം ആണ് ഇത്. കാർവാൻ, സോയ ഫാക്ടർ എന്നിവ ആയിരുന്നു ദുൽഖറിൻറ്റെ മറ്റു ബോളിവുഡ് ചിത്രങ്ങൾ. നിരവധി മലയാളം, തമിഴ് ചിത്രങ്ങളാണ് ദുൽഖറിൻറ്റെ ഇനി പുറത്തിറങ്ങാനുള്ളത്. പിടികിട്ടാപ്പുള്ളി സുകുമാരക്കുറിപ്പിൻറ്റെ ജീവിതം പറയുന്ന കുറുപ്പ്, റോഷൻ ആൻഡ്രൂസ് സംവിധാനം ചെയ്യുന്ന സല്യൂട്ട് എന്നീ ചിത്രങ്ങളുടെ ചിത്രീകരണം ഇപ്പോൾ പൂർത്തിയായിരിക്കുകയാണ്. കൂടാതെ ദുൽഖറിൻറ്റെ ജന്മദിനത്തോട് അനുബന്ധിച്ച് നിരവധി ചിത്രങ്ങളും പ്രഖ്യാപിച്ചിട്ടുണ്ട്.